大家好，我係阿金，我已經加入阿棍屋呢個大家庭兩年啦。

我對熟悉同鍾意嘅人，係非常忠心又乖巧㗎～我親人、好嗲，最鍾意俾信任嘅人摸摸，你一摸我，我就會成個心溶晒🥰 不過呢，呢份熱情只會留俾我喜歡同信任嘅人，對陌生人我就會保持距離。

我同阿威係同胎兄弟，我哋感情好好㗎。

不過，有以下幾點需要我未來主人注意一下，第一，我喺籠入面嘅自我保護意識好強，有地盤主意，所以對陌生人唔係太友善。呢個係我嘅安全感來源，希望大家能明白。

第二，我對食物有啲執著，會有護食嘅行為。如果你喺我食緊嘢嘅時候伸手埋嚟或者收走個糧兜，我可能會因為太緊張而咬人，所以餵食嘅時候需要小心，唔好喺我面前收糧兜。

希望未來主人願意接納我呢個忠心、嗲人但又有啲「惡習」嘅金仔🐶💛